Елімізде орта білім саласындағы іргелі істердің барлығы – Мемлекет басшысы Қасым-Жомарт Тоқаевтың жүргізген жүйелі реформаларының нақты нәтижесі. Ел Президентінің білім сапасына, ұстаздар еңбегіне, бала қауіпсіздігіне ерекше қамқорлық көрсетуінің астарында терең өмірлік миссия жатыр. Ол – білім арқылы ұлт сапасын арттыруға деген бағдар. Мектеп инфрақұрылымының қарқынды дамуы, сондай-ақ цифрлық инфрақұрылымды дамыту жұмысының белсенділігі бұл салаға деген ерекше ықыластың айғағы.
Биыл еліміздің оқу-ағарту саласы үшін табысты жыл болды. Бұл жыл сандық көрсеткіштерімен қатар, сапалық өзгерістерімен де ерекшеленді. Мемлекет басшысының тапсырмасымен елімізде апатты әрі 3 ауысымды мектеп саны едәуір азайып жаңа мектептер ашылды, цифрлық инфрақұрылымды жаңғырту ісі басталды. Мұғалімдер мен оқушыларды қолдауға бағытталған мемлекеттік саясаттың тиімділігі халықаралық зерттеулер мен олимпиада нәтижелері арқылы дәлелденді. Біз үшін қазіргі басты міндет – білім мазмұны мен мектептегі тәрбиенің салмағы мен тереңдігін арттыру. Ұстаздардың көңіл күйі мен қоғамға ризашылығы олардың еңбегінің нәтижесіне тікелей әсер ететіні сөзсіз. Сондықтан халықаралық жарыстарда оқушылар қол жеткізген жетістіктер білікті де ізденімпаз ұстаздар мен еңбекқор оқушыларымыздың жетістіктерінің бір парасы ғана. Біз келер жылы да білім жүйесін одан әрі жетілдіруге күш саламыз. Осылайша, барлық оқушы мен ұстазға тең мүмкіндік ұсынатын, білім мазмұны еңбек нарығына сәйкестендірілген білім экожүйесін құруға ұмтыламыз.
Жұлдыз СҮЛЕЙМЕНОВА,
Оқу-ағарту министрі
